NƏ ÜÇÜN MODEL DERS?
Bildiyiniz kimi informasiyanın sürətli şəkildə çoxalması onun izlənməsini bir o qədər də çətinləşdirir. Bu səbəbdən də texnoloji yeniliklə ayaqlaşmaq üçün müəllimlərin bir-birinə dəstək olmasına, həmçinin birlikdə yaratmasına olduqca böyük ehtiyac var. Hər kəsin özünəməxsus metodikası və fərdi yanaşması var. Ancaq bu metodika çox təəssüf ki, paylaşılmır və ya itib gedir. Çox maraqlı qurulan bir dərs ya kompüterimizin yaddaşında lazımsız şəkildə qalır, ya da müəllimlər tərəfindən bilərəkdən gizli saxlanır və cəmiyyət üçün lazımlı bir dərsə çevrilə bilmir. Lakin həmin müəllimin dərsinə cəmiyyətdə nə qədər insanın ehtiyacı olduğunu heç düşünmüsünüzmü? Hətta bəzən bir dərs nümunəsi görmək üçün ödənişli təlimlərə qatılaraq nə qədər pul xərcləyirik. Təbii ki, təlimlər bir insanın inkişafı üçün çox vacibdir, lakin bütün mövzular üzrə təlimlərə qatılmaq ya mümkün deyil, ya elə bir təlim paketləri yoxdur, ya da olsa belə, bir o qədər pul xərcləməyə gücümüz çatmaz. Bütün bu çətinliklər və problemləri nəzərə alaraq müəllimlər üçün birlikdə praktiki dərs nümunələrini yaradacaq bir platforma ortaya qoyduq. Respublikanın istənilən yerindən bu platformadan həm istifadə edə bilərsiniz, həm də dərslərinizi digər müəllim yoldaşları ilə paylaşa bilərsiniz (Hələki bizim vasitəmizlə paylaşım edə bilərsiniz). Belə bir platforma universitetləri bitirən tələbələr üçün işıq yolu olacağına da əminik. Həmçinin müəllimlər yüzlərlə hazır dərs nümunələrindən və metodikadan istifadə edə biləcək. Bir anlığa təsəvvür edin ki, biri gəlib sizə deyir ki, sabah keçəcəyiniz dərsi araşdırıb mükəmməl şəkildə Təqdimatını (PowerPointini) hazırlamışam, əlavə olaraq da həmin mövzuya aid icmal, iş vərəqi, sınaq, oyun, video nümunələri də yığmışam. Sizin həmin şəxsə nə qədər təşəkkür edəcəyinizi isə biz təsəvvür edirik. Xüsusi olaraq onu da qeyd edək ki, layihəni kompüterdə istifadə etmək daha məqsədəuyğundur. Mobil variantda problemlə qarşılaşa bilərsiniz.
Bütün bunları nəzərə alaraq Azərbaycan dili və ədəbiyyatla bağlı bütün materialları bu modelders.az səhifəsinə yerləşdirəcəyik. Sizlər üçün faydalı olacağına inanırıq. Hər kəsə uğurlar...
ÇƏKİLƏN ƏMƏYƏ QİYMƏT
Bizlərdə belə bir psixologiya formalaşıb ki, əgər sistem ödənişlidirsə, onu hər hansı bir yolla surətini çıxarıb özümüz üçün ödənişsiz etməliyik. Əziz istifadəçilər, bu səbəbdən ödənişi çəkilən əziyyətin qarşılığından qat-qat aşağı qoyuruq ki, insaflı olub əziyyəti dəyərləndirək. İnan ki, o faylların surətini çıxarıb dağınıq istifadə etməkdəndirsə, aylığı bircə dəfə ödəyib sistemli şəkildə hər zaman istifadə etmək daha yaxşıdır.
Siz bir müəllimsiniz. Çəkilən əziyyətin nə olduğunu yaxşı başa düşürsünüz. Simvolik qoyulan abunə haqqın ödəməklə həm bizə, həm özünüzə dəstək, həm də qiymət vermiş olursunuz! Seçimi sizin özünüzə buraxırıq...